Мо тыгай межеваний да молан тудым ыштыман?

19 Сентября 2023

Межеваний (межам ыштымаш) – тыгай процедур, кудын пытартышланже пошкудо участке-влак кокласе границе (вес семынже – чек) верыште палемдалтеш.

Марий Эл Республикысе Росреестырын виктемже мланде участке собственник-влаклан межеванийым ышташ да Иктешлыме кугыжаныш реестырыш рашемдыме информацийым пурташ темла.

Тачысе кечылан закон почеш обязательный межеваний огеш кул. Чыла тиде паша шке кумылын ышталалтеш. Но палаш кулеш, лачак межеваний тендам шуко проблеме деч утара. Кызытеш практикыште чын чек укелык пошкудо шамыч кокласе каргашымаште, конфликтыште тун причинылан шотлалтеш.

Межеванийым ыштеда гын, пошкудо ден кокласе границыдам келыштареда, шке правадам араледа, тыгак судыштат мланде участкылан учашаш огеш перне.

Чекын (границын) улмыжо тыланда нелылык деч посна мланде дене кеч-могай сделкым ышташ полша. Мутлан, тыгай участкым ужалашат куштылгырак лиеш, вет покупательлан, очыни, чек укелыкан участкым налаш кумылжо огеш лий.

Тыгак межеваний негызыште Иктешлыме кугыжаныш реестырыште йонылышымат торлаташ лиеш. Мутлан участкыдан кумдыкше кугыжаныш реестырысе информаций деч, документышто возымо кумдык деч ойыртемалтеш.

Тыгай йонылыш кадастр акым йонылыш шотлымылан, мланде налогым йонылыш палемдылан амалже лиеш.